Geet-Ghazal or Shairo-Shairi

Phir mujhe dida-e-tar yaad aaya

dil jigar tashna-e-fariyad aaya

dam liya tha na qayamat ne hanoz

phir tera vaqt-e-safar yaad aaya

sadagi haye tamanna yani

phir wo nairang-e-nazar yaad aaya

uzr-e-vamandagi ae hasrat-e-dil

nala karta tha jigar yaad aaya

zindagi yun bhi guzar hi jati

kyon tera rahguzar yaad aaya

kya hi rizavan se ladai hogi

ghar tera khuld mein gar yaad aaya

aah wo jurrat-e-fariyad kahan

dil se tang aake jigar yaad aaya

phir tere kuche ko jata hai khayal

dil-e-gumgashta magar yaad aaya

koi virani-si-virani hai

dasht ko dekh ke ghar yaad aaya

main ne majanun pe ladakapan mein ‘asad’

sang uthaya tha ke sar yaad aaya

Poet of the Poem / Ghazal or Nazam : Mirza Ghalib

Phir is duniya se ummid-e-vafa hai

tujhe ae zindagi kya ho gaya hai

badi zalim nihayat bevafa hai

ye duniya phir bhi kitni khush-numa hai

har ik apne hi gham mein mubtila hai

kisi ke dard se kon aashna hai

mere naqqad meri shayari to

mere tute huye dil ke sada hai

kahan hun “shad” main to shad sa hun

wo shad-e-khush-nava to mar chuka hai

Poet of the Poem / Ghazal or Nazam : Naresh Kumar Shad

Tang aa chuke hain kash-ma-kash-e-zindagi se hum

thukra na den jahan ko kaheen bedili se hum

mayusi-e-ma’al-e-mohabbat na puchiye

apanon se pesh aaye hain beganagi se hum

lo aj hum ne tod diya rishta-e-ummid

lo ab kabhi gila na karenge kisi se hum

ubharenge ek bar abhi dil ke val-vale

go dab gaye hain bar-e-gam-e-zindagi se hum

gar zindagi mein mil gaye phir ittafaq se

puchenge apna hal teri bebasi se hum

ALLAH re fareb-e-masahiyat ke aj tak

duniya ke zulm sahate rahe khamoshi se hum

hum gam-zada hain laye kahan se khushi ke geet

denge wahi jo payenge is zindagi se hum

Poet of the Poem / Ghazal or Nazam : Sahir Ludhianvi

Pathar sulag rahe the koi naqsh-e-pa na tha

hum us taraf chale the jidhar rasta na tha

parchaiyon ke shahar ke tanhaiyan na puch

apna sharik-e-gam koi apne siva na tha

yun dekhati hai gumshuda lamhon ke mod se

is zindagi se jaise koi vasta na tha

cheharon pe jam gai thin khayalon ke ulajhanen

lafzon ke justaju mein koi bolata na tha

khurshid kya ubharate dil ke tahon se hum

is anjuman mein koi saharashana na tha

Poet of the Poem / Ghazal or Nazam : Mumtaz Rashid

Tarz jine ka sikhati hai mujhe

tashnagi zeher pilati hai mujhe

raat bhar rahati hai kis baat ke dhun

na jagti hai na sulati hai mujhe

ruthata hun jo kabhi duniya se

zindagi aake manati hai mujhe

aaina dekhun to kyunkar dekhun

yaad ik shakhs ke aati hai mujhe

band karta hun jo aankhen kya kya

roshani si nazar aati hai mujhe

koi mil jaye to rasta kat jaye

apni parachai darati hai mujhe

ab to ye bhool gaya kis ke talab

des parades phirati hai mujhe

kaise ho khatm kahani gham ke

ab to kuch neend si aati hai mujhe

Poet of the Poem / Ghazal or Nazam : Khalil ur Rahman Azmi

Tere bagair ye ab zindagi kahan guzri

qadam qadam pe tere sath ka guman guzri

ye din jo dhire se phisala to sham ke manzar

tere bagair udasi ke daramiyan guzri

wo ashk hun ki sar-e-rah gir gaya tha kabhi

utha saka na koi kitne karavan guzri

main khushk hoke bikharata raha hun pairon mein

bahut zamana hua mujh pe kashtiyan guzri

tere badan ka aalao ho meri sanson mein

kabhi wo lamha bhi ik bar jan-e-jan guzri

ye baat ab bhi nahi hai kisi se kahane ke

tamam sajde tere dar se rayagan guzri

Poet of the Poem / Ghazal or Nazam : Hafeez Aatish