Bartari ke suboot ki khatir

Tabassum Fatima

Kuchh dinon pahle BAZME IMKAAN me sahir ludhiyanwi ki nazm SHARIF INSAANO

ka kuchh hissa Sonsi Sunil sahab ne post kiya tha, baqi hissa aj azeem shayer ke birthdey k maoqe

par pesh-e khidmat hai

Bartari ke suboot ki khatir

Jang karna hi kya zaroori hai

Ghar ki tareekiyan mitane ko

Ghar jalana hi kya zaroori hai

Jang k aur bhi to maidaan hain

Sirf maidan-e kasht-o khoon hi nahi

Hasil-e zindagi khirad bhi hai 

Hasil-e zindagi junoon hi nahi

Aao is tirah bakht duniya me

Fikr ki roshni ko aam karain

Amn ko jis se taqwiyat pahonche

Aisi jangon ka ehtmam karain

Jang wahshat se barbariyat se

Amn tahzeeb-o irteqa k liye

Jang marg aafreen siyasat se

Amn insaan ki baqa k liye

Jang aflaas aur ghulami se

Amn behtar nizaam ki khatir

Jang bhatki huyi qayadat se

Amn bebas awaam ki khatir

Jang sarmaay ke tasallut se

Amn jamhoor ki khushi k liye

Jang jangon ke falsafe k khilaaf

Amn puramn zindagi ke liye